இன்றைய வானிலை

  • 29 °C / 84 °F

Jallikattu Game

அணுகுண்டுகளாலும் அழிக்க முடியாத மனிதர்!

August 9, 2018
Image

கா.அருண்

கட்டுரையாளர்

Image

ஹிரோஷிமா மற்றும் நாகசாகி என இரண்டு அணு குண்டு தாக்குதல்களிலும் இருந்து உயிர்தப்பிய அதிசய மனிதர் பற்றி தெரியுமா?

73 ஆண்டுகளுக்கு முன்னர் அதாவது 1945ம் ஆண்டு, ஆகஸ்ட் 6ஆம் தேதி, ஒட்டுமொத்த ஜப்பான் தேசத்தையும் புரட்டிப்போட்ட நாள் என்றே கூற  வேண்டும்.. அதுவரை உலகம் கண்டிராத ஒரு மோசமான சம்பவத்தை ஜப்பானிய மக்கள் அன்றைய தினத்தில் சந்தித்தனர்.

மனித வரலாற்றிலேயே மிகவும் மோசமான யுத்தம் என வர்ணிக்கப்படுவது இரண்டாம் உலகப் போர், இதில் சுமார் 30 நாடுகளைச் சேர்ந்த 10 கோடி பேர் நேரடியாக யுத்தம் செய்தனர். சுமார் 7 கோடி பேரை பலிவாங்கிய இந்த போரின் உச்சகட்ட கொடூரத்தை ஜப்பான் சந்தித்தது.

மிட்சுபிஃஷி நிறுவனத்தில் பணியாற்றிவந்த Tsutomu Yamaguchi என்பவர் ஹிரோஷிமா நகரத்தில் பணி நிமித்தமாக 3 மாத காலம் தங்கியிருந்தார். அவருடைய வேலையை முடித்துக்கொண்டு அவரும் அவருடைய சகாக்கள் இருவரும் ஊர் திரும்புவதற்காக ரயில் நிலையத்திற்கு சென்றுகொண்டிருந்தனர். அந்த சமயத்தில் Hanco எனப்படும் பயண முத்திரையை தங்குமிடத்திலேயே விட்டுவிட்டுவந்ததை அறிந்த Yamaguchi அதை எடுத்துவருவதற்காக தங்குமிடத்திற்கு தனியாக திரும்பினார்.

அந்த சமயத்தில் தான் அந்நகரில் அமெரிக்காவின் B-29 ரக குண்டு வீசும் விமானம் மூலம், லிட்டில் பாய் என அழைக்கப்பட்ட அணு குண்டை ஜப்பானின் ஹிரோஷிமா நகரின் மீது அன்றைய தினம் காலை 8.15 மணியளவில் வீசியது. 

Yamaguchi இருந்த இடத்தில் இருந்து 3 கிலோமீட்டர் தொலைவில் தான் அந்த அனுகுண்டு வீசப்பட்டிருந்தது. குண்டுவீச்சினால் அவர் தூக்கி வீசப்பட்டார். அவரின் கண்களின் பார்வை தற்காலிகமாக பறிபோனது, அவரின் உடலின் மேற்பகுதி முழுவதும் தீக்காயங்கள் ஏற்பட்டன. வலது காதில் செவித்திறன் முற்றிலும் பாதிக்கப்பட்டது. பின்னர் சுதாரித்துக்கொண்ட அவர் மெல்ல ஊர்ந்து அருகில் இருந்த air-raid shelter என்றழைக்கப்படும் வான் தாக்குதல்களில் இருந்து பாதுகாக்கும் அறைக்கு சென்றார். போர் சமயத்தில் ஜப்பானின் பல பகுதிகளில் பதுங்குகுழிகள் போன்ற பாதுகாப்பான தங்கும் அறைகள் ஏற்படுத்தப்பட்டிருந்தது குறிப்பிடத்தக்கது.

பின்னர் அவருடைய சகாக்களும் பாதுகாப்பாக இருந்ததையறிந்து அவர்களுடன் இணைந்த அவர், அன்றைய இரவை ஹிரோஷிமாவிலேயே கழித்தார். இந்த கோர தாக்குதலில் சுமார் ஒரு லட்சத்து 40,000 பேர் மரணமடைந்த நிலையில் இவர் உயிர் தப்பியது ஒரு அதிசய நிகழ்வாகும்.

உயிர் தப்பிய Tsutomu Yamaguchi, அடுத்த நாள் காலையில் அங்கிருந்து புறப்பட்டு மேற்கு திசையில் 180 மைல் தூரத்தில் இருக்கும் தன் சொந்த ஊரான நாகசாகிக்கு பயணமானார். 

நாகசாகிக்கு சென்று சேர்ந்த அவர் தனது காயங்களுக்கு சிகிச்சை பெற்றுதுடன், ஆகஸ்ட் 9ஆம் தேதியன்றே பணிக்கு திரும்பியுள்ளார். ஹிரோஷிமாவில் அவருக்கு நேர்ந்த நிகழ்வுகளை தனது உயரதிகாரியிடம் Yamaguchi விவரித்துக்கொண்டிருந்த போது சரியாக காலை 11 மணியளவில் மீண்டும் ஒரு முறை அமெரிக்காவின் போர் விமானம் ஒன்று ஹிரோஷிமாவில் வீசியதைக் காட்டிலும் அதிக சக்தி வாய்ந்த  ‘Fat Man’ என்ற அணு குண்டினை அந்த நகரின் மீது வீசியது..

சென்ற முறை போலவே இம்முறையும் Tsutomu Yamaguchi-யின் அலுவலகத்தில் இருந்து 3 கிமீ தூரத்திலேயே இந்த அணு குண்டு வீசப்பட்டிருந்தது. என்றாலும் அதிர்ஷ்டவசமாக ஹிரோஷிமாவில் ஏற்பட்டது போன்று பெரியளவில் காயங்கள் அவருக்கு ஏற்படவில்லை. இருப்பினும் அவருக்கு ஒரு வாரத்திற்கும் மேலாக கடுமையான காய்ச்சல் இருந்தது.

நாகசாகியில் நடத்தப்பட்ட அணுகுண்டு தாக்குதலில் 70,000 பேர் கொல்லப்பட்ட நிலையில் மீண்டும் ஒரு முறை அதிர்ஷ்டவசமாக Tsutomu Yamaguchi உயிர்தப்பினார். ஜப்பானில் நடத்தப்பட்ட அணுகுண்டு தாக்குதல்களே இந்த உலகில் இதுவரை நடத்தப்பட்ட முதல் மற்றும் கடைசி அணுகுண்டு தாக்குதல்கள் என்ற நிலையில் அந்த இரண்டு தாக்குதல்களிலுமே சிக்கி அதிசயிக்கத்தக்க வகையில்  Tsutomu Yamaguchi மட்டுமே உயிர்தப்பியுள்ளார் என்பது விஷேசமானது.

இரண்டு அணுகுண்டு தாக்குதல்களையும் சந்தித்து உயிர்தப்பியவராக Tsutomu Yamaguchi, ஜப்பான் அரசால் அங்கீகரிக்கப்பட்டுள்ளார். இவர் ஒருவருக்கு மட்டுமே ஜப்பானிய அரசு அத்தகைய அங்கீகாரம் அளித்துள்ளது குறிப்பிடத்தகக்கது.

இதனிடையே ஹிரோஷிமா மற்றும் நாகசாகி என இரண்டு தாக்குதல்களிலும் இருந்து தனித்தனியாக தப்பியவர்கள் பலர் அதன் பின்னர் புற்றுநோய் உள்ளிட்ட பல நோய் தாக்குதல்களில் சிக்கி உயிரிழந்த நிலையில் Tsutomu Yamaguchi 2010ஆம் ஆண்டில் தனது 93 வயதில் வயிற்றுப்புற்று நோய் காரணமாக மரணமடைந்தார்.

தன்னுடைய அனுபவங்கள் குறித்து Tsutomu Yamaguchi புத்தகம் ஒன்றை எழுதி வெளியிட்டுள்ளார். இது தவிர கவிதை புத்தகம் ஒன்றும் எழுதியுள்ளார். இவரின் அனுபவங்களை குறும்படமாக்கி அதனை ஐ.நா சபையில் திரையிட்டுள்ளனர். அப்போது அணு ஆயுதங்கள் தயாரிப்பினை கட்டுப்படுத்துமாறு அவர் உலக நாடுகளுக்கு கோரிக்கை வைத்தார். Twice Survived: The Doubly Atomic Bombed of Hiroshima and Nagasaki என்ற அவரின் டாகுமெண்டரி குறும்படம் உலகப் பிரசித்தி பெற்றதாக பின்னாளில் மாறியது.







இக்கட்டுரையின் கருத்துக்கள் கட்டுரையாளரையே சாரும், நியூஸ்7 தமிழ் இதற்கு பொறுப்பாகாது.

Image
Image

பெட்ரோல் டீசல் விலை தமிழ்நாடு

  • பெட்ரோல்
    ₹85.50/Ltr (₹ 0.00 )
  • டீசல்
    ₹78.61 /Ltr (₹ 0.26 )